Կա Մեծարենց, կա Տերյան, և բազում այլ պոետներ կան,
Բայց Թումանյանն է անհաս Արարատը մեր նոր քերթության:
Եղիշե Չարենց
2008թվ. փետրվարի 19-ից ի վեր ՀՀ կառավարության որոշմամբ ամենայն հայոց բանաստեղծ Հովհաննես Թումանյանի ծննդյան օրը նշվում է նաև, որպես գիրք նվիրելու օր: Որքան կուրախանար ինքը՝ Հովհաննես Թումանյանը, եթե իր կենդանության ժամանակ տեսներ, որ իր ծննդյան օրն է հայտարարվել Գրքի նվիրատվության օր… իր ծննդյան օրն է, որ մարդիկ ծանոթ թե անծանոթ իրար տեսնելիս՝ գիրք են նվիրում…
Կապանի Էլեկտրոնային գրադարանում կազմակերպվել էր միջոցառում նվիրված Հովհաննես Թումանյանի ծննդյան օրվան: Միջոցառմանը ներկա գտնվեցին Կապանի թիվ 5 հիմնական դպրոցի I Բ դասարանի աշակերտները, դասվար՝ Արևիկ Աբրահամյանի ուղեկցությամբ:
Միջոցառմանը իրենց մասնակցությունն էին բերել Կապանի արվեստի մանկական դպրոցի թատերարվեստի բաժնի սաները՝ Արթուր Գաբրիելյանի գլխավորությամբ, որոնք ներկաներին իրենց գեղեցիկ բեմական խաղով մատուցեցին Թումանյանի «Անխելք մարդը»,«Բարեկենդանը» և «Սուտլիկ որսկանը» հեքիաթները:
Աշակերտները Թումանյանական ասմունքով էլ ավելի բովանդակալից դարձրեցին միջոցառումը:
